منوعاتالأخبار

معجزة في غرفة العمليات

تناقل روّاد منصّات التواصل الاجتماعي، شهادة ممرّضة، حول ما حادث في غرفة العمليات في المستشفى الإسلامي في الأردن، خلال ولادة إحدى السيّدات.

وجاء في شهادة الممرّضة نيفين شديد:

تفاصيل بدون مبالغة .. #المستشفى_الاسلامي
دخلت مريضتنا عملية قيصرية مبرمجة يوم الاثنين و هي و اهلها عارفين انها حتكون صعبة لانها مشخصة من قبل انه في مشاكل في المشيمة و ممكن جدا او غالبا نستأصل الرحم ..

عملية بلشت من الساعة ٩.٣٠ و خلصت الساعة ٤
ضغط المريضة لاكتر من ساعة وصل ٢٠/٤٠
نزيف حاد .. اكتر من ١٢٠ وحدة دم و مشتقاته اخدت ( بنك الدم المركزي ما بلحق عهيك سحب بيوم و الحمدلله عنا بنك دم خاص)
اكتر من ٦ استشاريين من مختلف التخصصات واقفين فوق راسها غير الاطباء المقيمين و التمريض.
فقدت تقريبا ٨ لتر دم و هو كل الدم اللي بالانسان يا دوب ٥ لتر !
قوة دمها كانت ١١.. اثناء العملية وصلت ٣
دمها صار لونه زهر و خفييف بطل احمر زي الدم الطبيعي.
علميا المريضة عم بتموت من بين ايدينا .. و لو عاشت (و هو احتمال ضعيف) دماغها ما بعيش لانه الدم اللي عم تاخده ما فيو اكسجين و الضغط نازل لفترة طويلة كتير اكتر من المدة المسموح فيها.
و اللي بتفرج من برة غرفة العمليات .. تقريبا ١٥ واحد بالغرفة كل حدا عارف شو بعمل ما حدا بضارب عالتاني
و الكل شغال على قدم و ساق و اللسان واحد : يا رب ! 🤲
بهيك حالات طبيعي تسمع طبيب بصرخ مثلا او ممرض تايه بين طلبات الاستشاريين او تخدير بلاخم
لانه كل شي دخل ببعضه .. بس انا شخصيا مو عارفة كيف كان الكل هادي 😅
هادي و بشتغل بدون ما نتخابط بالغرفة اللي للحظات كتير شفتها صغيييرة لانه في الف حدا شغال معنا فيها !
ووصلنا مرحلة اجرينا مو حاملينا و ريقنا نااشف و الواحد نفسه يوصل تواليت 😅 .. بس الوضع لا يحتمل..
الي بشتغل ١٥ سنة .. شفنا حالات كتير هيك و خسرنا مريضات لاسباب اقل من هيك
بس هاي الحالة كانت اصعبهم ..
كمية الدم و النزيف .. التعقيدات اللي صارت .. كانت مختلفة ..
ع ٤ سكروا المريضة و احنا عارفين انه حنرجع نفتحها بس كان الدعاء انه يا رب تصمد للصبح.
و فعلا فتحناها مرة تانية بعد الفجر و نزفت كمان اللي نزفته .. و هاي المرة سكروها و الامل اكبر.

مريضة وحدة داخلة تولد شغلت مستشفى كبيير بكل كوادره..
و العجيب بهاي الحالة هو كم الدعوات .. اي حدا من الكادر الطبي و غير الطبي اللي ماشي بالمستشفى بدعيلها و بتطمن عليها.

النتيجة الاخيرة لحد مبارح الخميس :
طلعنا زرنا المريضة في غرفتها في الطابق بعد ايام قضتها في العناية الحثيثة
و الحمدلله بتمشي و بتحكي و بتضحك 😍

انا مش من الناس اللي بكتب كتير عن الحالات اللي بنشوفها . و لو انه لو اكتب بعمل كتاب 😂
المهم ..
الفكرة من هاد البوست ( و اللي تحفظت عن ذكر اسماء و تفاصيل اكتر حفاظا على الخصوصية )

١… هو انه احكي انه مش كل شي بالحياة تحصيل حاصل.. صح مريضة دخلت تولد بس كان ممكن جدا ما تطلع و لو طلعت .. ما تطلع سليمة . مجرد انها طلعت ع الغرفة تمشي و تضحك و تحكي هاي #معجزة.

٢ … زي ما في كوادر طبية بتشتغل بلا ضمير.. في كوادر طبية بتعمل فوق طاقتها و بتشتغل اكتر من المطلوب و المعقول .

٣ .. مو دايما تسمعوا لتجارب الناس .. الناس الها بالظاهر.. والله في جروبات خصوصا للامهات و النسوان بقرأ عليها العجب العجاب.. ما بتعرفوا شو بصير حقيقة بين الاسوار و جوا الغرف لهيك ما تاخدوا من تجارب بعض 🤷‍♀😅

٤.. وجود اخطاء طبية لا يعني عدم وجود انجازات طبية

٥ … الدعاء الدعاء .. فعلا يغير الاقدار .

#هو_بفضل_الله_أولا_وأخيراً”

تعليقات المتابعين

وعلّقت وفاء منصور على منشور نيفين بالكتابة قائلة: “الحمدلله عالسلامة، كل اشي بايد ربنا طبعا، بس والله الاسلامي غير دكاترة وتخدير رااااائعين”

فيما كتبت ديما “انا عندي قناعة تامه انه مهما كان في ناس مهملة ومستهترة في بالمقابل ناس تعمل بضمير وتخاف ربنا وعندها إخلاص بالعمل وتخاف على حياة الآخرين… الله يعطي كل إنسان على قد نيته”

فيما كتبت إيناس الربايعة تعليقا على المنشور “الاخطاء الطبية بشرية، واردة ان لم تكن نتيجة إهمال، والاقدار تسبق خوارق الهمم، الله يعطيهم العافية، وكل انسان متقن ومخلص في عمله”

زر الذهاب إلى الأعلى
تلفزيون المدينة

مجانى
عرض